Gecə Zəngləri - Faiq Ağayev

Səni bir qaranlıq gecənin

Zəngi apardı bu dünyadan…

Bəlkə bu gecənin zəngini

Təskinlik üçün uydurmuşam?..

Yoxluğuna mən inanmadım

Çox yalvardım, ana, çox sənə

Güc gələ bilmədi harayım

Gecənin bu bəd xəbərinə…

Allah bu günahımı bilsə

Bağışlamaz heç zaman məni

Qoruya bilmədim ölümdən

Nə atamı, nə də ki, səni…

Atamın könlünü al, ana

Bəlkə soyuyar bir az kini?

Mən də sənin bir gün yanına

Həmişəlik gələnə kimi…

Deyirlər, insan sönəndə

Talehinin ulduzu axır…

Bəs niyə

Niyə göylərin üzündən

Mənə bir təzə

Təzə ulduz baxır?

Niyə, ana?